म त्यस्तै गर्छु

मैले भन्दिएको छु -

मेरो नाममा नबस्नु तिमी तीजको व्रत

ग्यासट्राइटिस हुर्काएर आफूमा

नगर्नु मेरो दिर्घायूको कामना

पढेर स्वस्थानीको अमूर्त श्लोकहरु

नठान्नु मलाई महादेव

नपिउनु मेरो पाउ धोएर

पिसाब र पसिना गन्हाएको जल

अहँ, नचढाउनु मन्दिरमा मेरो प्रगतिको लागि

फूल, अक्षता र भेटी

म चहान्छु बरु,

ढोग्नु माटो तिमीले

सम्झनु सधैं पुर्खाहरुलाई

हेर्नु आफ्नै पाइतालाको फैलावट

बाँड्नु मसँग बालापनका कथाहरु

र सपनाहरु कहनु ।

निधारको रेखामा हैन

औंलाको गतिशिलतामा हुन्छ भविष्य

राशिफलमा हैन आफ्नो दिन

बिहानी मुस्कानमा हुन्छ त्यो

कोसँग छ र यहाँ अरुको मनको कुरा बुझ्ने क्षमता ?

कसले सक्छ यहाँ अरुको इच्छा पूरा गर्न ?

सिवाय आफू

तसर्थ,

मैले आफूलाई बुझेँ भने

तिमीले आफूलाई बुझ्यौ भने

आमुने-सामुने भएर एकअर्काको आँखामा

एकअर्कालाई देख्यौं भने

बुझ्न सक्छौ हाम्रो संसार हामी

देख्न सक्छौं जीवनको सुन्दरता

बस् , तिमीले आफूलाई बुझ्नु

र बुझाइको लम्बाई ल्याइपुर्याउनु मसम्म

म त्यस्तै गर्छु ।