बिदाई

सुटुक्कै केहि लिएर जाँदैछु म तिमीबाट

जस्तो कि

रमाउने प्राकृतिक शैली

जीवनका नयाँ रङ्ग

केही पहाडी शब्दचित्र

अनुभूति र केही प्रश्नहरु

अनि रुपान्तरित तिमीप्रतिको मानसिकता

पक्कै केही दिएर पनि जाँदैछु तिमीलाई

जस्तो कि -

थेप्चो नाकको पहिचान

मेरो होचो उमेरको पदछाप

अलिकति मौलिक हाँसो र व्यवहारिक जवाफहरु

अनि म प्रतिको आश्चर्यजनक कौतुहलता

खुलम्खुल्ला

तिमी मप्रति हाँसेकै छौ

म तिमीप्रति हाँसेकै छु

खुशीको कुरा -

हामी एकअर्कालाई सम्झेर रुने छैनौ - बस यति हो

तिमी जे छौ, जो छौ

मेरो यात्राको पहिलो -

चौतारी हौ - जहाँ बिसाए

साथी हौ - जसलाई अँगाले

ओ जुम्ला !

यो उठाएको हात - तिमीलाई सलाम हो

यो उठाएको शिर - तिमीलाई सम्मान हो 

यो हिडेको पाइताला - तिमीलाई सम्झना हो

म जाँदैछु

कुरा यति हो 

हामी एकअर्कालाई सम्झेर कहिल्यै दुख्ने छैनौ - बस !

  

   

                                                                                  
२०७१,०२,१४, जुम्ला