नयाँ बिहानी

ढुक्क हुनुपर्ने कुरा यति हो की

तिमी र म

ब्युँझिसकेका छौ ।

खै घाम त तर,

त्यसको र उसको लागि जस्तै

सँगै उदाउनु पर्ने होइन र !

यो मध्यान्हमा पनि

कस्तो अध्याँरो बाँचीरहेछौं हामी

बाँचेको थाहा पाउन पनि

छामछुम छामछुम गर्नुपर्ने भितालाई

चिमोट्नु पर्ने आफ्नै माशंपेशी

हेर त प्रकाश अझै पोखिएको छैन

पटपट चिरिएको हाम्रा पाइतालामा

र त गोडाहरु बारम्बार ठेस खाइरहेछ एकआपसमा

अझै ओढिरहेकै छ तिम्रो र मेरो ढाडले

त्यै ताप र रापमात्रै

र डढिरहेकै छ हाम्रो बस्तीका अनुहारहरु

धन्न, ढुक्क हुनुपर्ने कुरा यति छ की

तिमी र म

ब्युँझिसकेका छौ ।

फराकिलो निधार बोकेको आकाशमा

तिम्रो र मेरो घाम खोज्ने अभियान

घामभित्र उज्यालो खोज्ने सपना

अर्थात घामको विकल्प खोज्ने यात्रा

तर प्रश्न बन्न थालेको छ अचेल

हाम्रै इतिहास भन्दा ठूलो

हाम्रै जीवन भन्दा ठूलो प्रश्न

सायद यतिखेर

प्रत्येक अँध्यारो बन्दकोठामा

टुकी जन्माउन

तिम्रो र मेरो संसर्ग अनिवार्यता हो

सादा कागजमा

तिम्रो र मेरो समागमले लेखेका

क, ख, ग, घ र A, B, C, D बाट

परावर्तित टुकीको प्रकाश

तिम्रो र मेरो गुरुत्वक्षेत्रभित्र

हामीलाई चाहेको बिहानीको सङ्केत हुन सक्ला

अर्थात नौलौ बिहानी त्यो

एउटा उतर हुन सक्ला

प्रजातान्त्रिक एउटा गतिलो उतर

आउ !

तिमी र म

एक अर्कामा विलिन हौं ।

- २०६६ श्रावण २५ चावहिल